# iOS dasturchi bo’lish uchun qo’llanma

Ushbu lavhada junior (kichik) iOS dasturchi bo’lish uchun nimalarni o’rganish kerakligi haqida yozilgan. Qo’llanmani ishlatish uchun siz ingliz yoki rus tilini bilishingiz kerak. Agar bu tillarni bilmasangiz, avval ingliz tilini o’rganishni maslahat beraman.

### Mazmun

1.  [Swift](https://docs.swift.org/swift-book/LanguageGuide/TheBasics.html) dasturlash tilini o’rganing.
2.  [Stanford CS193P](https://cs193p.sites.stanford.edu) kursini o’tib chiqing. Yoki rus tilini bilsangiz [swiftbook](https://online.swiftbook.ru) kursini o’tib chiqing.
3.  [Shaxsiy loyihalar](https://github.com/florinpop17/app-ideas) yarating.
4.  Internship (stajirovka) toping.

Photo from developer.apple.com

### Swift dasturlash tilini o’rganing

iOS dasturlar yaratish uchun Swift ishlatiladi.

Agar siz dasturlashga yangi bo’lsangiz, unda [Swift playgrounds](https://www.apple.com/swift/playgrounds/) orqali Swift’ni o’rganing. Ushbu dastur [Mac](https://www.apple.com/mac/) yoki [iPad](https://www.apple.com/ipad/) talab qiladi.

Agar siz dasturlashni bilsangiz, unda [dokumentatsiya](https://docs.swift.org/swift-book/LanguageGuide/TheBasics.html) orqali o’rganish tezroq bo’lishi mumkin. O’zim ham dokumentatsiya orqali o’rganganman.

**Objective-C ni ham o’rganishim kerakmi?  
**Yo’q. Hozir Objective-C deyarli ishlatilmaydi. Uni o’rganmasangiz bo’ladi.

### iOS dasturlashni o’rganing

iOS dasturlashni o’rganish uchun zo’r kurs bu [Stanford CS193P](https://cs193p.sites.stanford.edu). Bu Stanford universitetida o’tiladigan ochiq kurs ma’ruzalari. U yerda uy vazifalari ham beriladi. Barchasini yechib chiqishni maslahat beraman. Men va ustozlarim ushbu kursni o’tib chiqganmiz.

Agar ingliz tilini bilmasangiz, lekin rus tilini tushunsangiz unda [swiftbook](https://online.swiftbook.ru) kursini maslahat beraman.

### Shaxsiy loyihalar qiling – pet projects

Kurs bitirgandan so’ng kichik dasturlar yarating. Darsliklar orqali dastur yaratish oson. Bor yo’g’i ko’rsatilgan narsani qaytarasiz va miyani uncha ishlatmaysiz. Darsliklarsiz dastur yaratish qiyinroq.

Kichik dasturlarni o’zingiz yaratganingizda 90% ko’proq narsa o’rganasiz. Qo’lingiz kelishadi va o’zingizga bo’lgan ishonch oshadi.

Qanday dastur yaratish haqida g’oyalarni [bu yerdan](https://github.com/florinpop17/app-ideas) topsangiz bo’ladi. O’zingiz nima dastur yaratishni o’ylab topsangiz bundan ham zo’r! Men bir paytlar zaldagi mashqlarni qayd etish uchun [dastur](https://github.com/darhonbek/WorkoutLog) yozganman.

### Ish izlang

Shaxsiy loyihalar qilish bilan barobar ish izlang. Stajirovka yoki Junior iOS dasturchi lavozimlariga topshiring.

Birinchi ishingizda maqsadingiz tajriba ortirish bo’lishi kerak. Kamroq pul to’lasa ham mayli. Men Super Dispatch’da 6 oy tekinga stajirovka qilganman.

Ishga topshirganda sizdan portfolio va rezyume so’rashadi. Portfolio bu siz yaratgan dasturlar. Portfolio yasab olish uchun shaxsiy loyihalar qilish yordam beradi.

Rezyume tayyorlash uchun Azimjon [ushbu o’zbekcha maqolani](https://azimjon.com/blog/yaxshi-rezyume-tayyorlash-haqida/) yozgan. Ingliz tilini biladiganlarga [ushbu lavha](https://www.careercup.com/resume) va men yozgan [qo’llanmani](https://github.com/darhonbek/resume_templates) maslahat beraman.

Tamom.

Maqolaning qoramalarini o’qib chiqqani uchun Azimjon Po’latov, Azizbek Matchanov, Muslimbek Abduganiyev, Nuruddin Iminohunov va Ummatoy Yuldasheva ga **rahmat!**

Yangi postlar [@TenxEngineer](http://t.me/tenxengineer) telegram kanalida e’lon qilinadi!

Savollaringiz bormi? Kelasi maqola uchun taklif bermoqchimisiz?  
Taklif va savollarni darkhonbek.interview@gmail.com ga yozing!